今日系alan个space睇到篇好funny既也，偷黎撑下场

谈论:由"點解'絲瓜'又叫'勝瓜'"引出話題:佛山話速成班

引用

今日寫用中文寫,真系難得,主要原因系要講下本地文化.

 

信大家都食過絲瓜,都知道'絲瓜'又叫'勝瓜'.但大家又有無考究過個中原因呢?

 

經我查證,得出以下學術性文章,比較長,但好有趣,希望大家睇曬(重要概念已用黃色標出,例子已用绿色標出,方便大家閱讀).

 

 

 

 

佛山話速成班

睇電視電影，通常講幾句鄉下話，例如臺山話(我鄉下話,識聽,識講些少)、潮州話，又或者係佛山話（順德話）(我識分,但唔識講)，都可以起到諧趣效果。作為學生,我地要學好英文,作為廣府人,我地當然要識講廣府話,廣東話,廣州話，作為佛山出世O既人，我都好應該喺度探討吓佛山話。

 

由於佛山話又可以細分為老城區話、石灣話、南海話、順德話等等，每種話都有各自特點，所以喺度主要參考老城區話，從聲母、韻母/聲調以及習語四方面與廣州話嘅分別總結佛山話嘅大致發音特點。

 

 

一.聲母  t —> h
    佛山話聲母嘅最大特點就係冇聲母t，廣州話以t為聲母嘅字，喺佛山話一律以h代替。例如：“天天見面”講成“牽牽見面”、“通殺”講成“兇殺”。更有頑固人士，將呢個規律應用到普通話上，因此“普通話”變成“普哄話”，“太陽”變成“害陽”。
    佛山話嘅發音同廣州話相比，除咗呢個顯著分別，另外重有個別字嘅聲母有變化，不過好難總結成規律。例如[佢]keoy5字，佛山話大多將其讀成heoy5；[瞓]fan3字讀成han3。

 

 

二.韻母
 1.i[*衣] —> y[*於]
    而家唔少人為咗開玩笑，都將“咩事”講成“咩樹”，其實呢個讀音就係來源於佛山話。喺佛山話裏面，韻母i[*衣]通常都讀成y[*於]，例如[寶芝林]變成[寶豬林]，[廁所]變成[處所]，[絲]變成[輸]，所以佛山人叫“絲瓜”做“勝瓜”，因為“輸輸”聲唔好“輕（聽）”。更有甚者將此規律應用到普通話甚至英語上面，我以前個化學“老書”用普通話同我哋講解“原子”、“分子”嘅時候，就講成“原組”、“分組”；電腦城個電腦仔更加搞笑，上次幫我部電腦重裝系統，話要格式化個“輸盤”，其實係話格式化個C盤。

 2、aau[*教] —> el（類似英文tell單詞黑體部分發音）
    某一部分字有呢種情況出現，例如[搞]讀成gel2，“瞓覺”讀成han3 gel3，但係呢個規律唔可以亂用於所有包含aau韻音嘅字上面，因為有好多字係唔允許噉發音嘅。  

 

 

三.聲調  第四聲－>第一聲高降調
    佛山話嘅聲調規律祇得一個，亦唔會有其他特別情況，所以比較講起上嚟比較簡單。佛山話冇第四聲（陽平聲），凡係廣州話第四聲嘅字一律轉調為第一聲嘅高降調。粵語第一聲可以分為高平調同高降調，舉個例，“村莊”個[村]讀高平調，“思想”個[思]讀高降調，關於高降調嘅更詳細說明可以參考《當今粵語懶音現象大觀》嘅聲調部分。
    雖然佛山話聲調祇有一個規律，但係聲調嘅變化係最難掌握嘅，好多貪過癮想學佛山話嘅人往往就係掌握唔到聲調嘅控制，該變調嘅亂變，唔該變調嘅都變埋。

 

 

四.石灣話   

石灣話比老城區話口音更濃，比廣州話變化更加大 。例如[眼]講成en5，[煙]講成en1，三個代詞[我]、[你]、[佢]讀成oi5、li5、ky5。為咗加深大家對佛山話嘅印象，下面送首用佛山話（石灣話）唱出嚟嘅歌仔畀大家：
    石灣[wen1]石灣[wen1]好多煙[en1]
    煙[en1]親我[oi5]隻眼[en5]
    醫來[loi1]醫去都醫唔[m1]返[fen1]
    我[oi5]以後都唔[m1]去石灣[wen1]
    上面首咁抵死嘅歌仔用石灣話唱出嚟，原來係押韻嘅！

 

 

五.習慣用語
    此外，佛山話重有一部分習慣用於唔同于正宗廣州話，例如：
    嗰—>佬：嗰個—>佬個，嗰便—>佬便，嗰日—>佬日
    喺度—>喺蓋：阿哥喺唔喺度呀？—>阿哥喺唔喺蓋呀？
    返屋企—>去歸：返屋企食飯—>去歸食飯
    未—>命：佛山話“未曾”講得快，就變成[命]音，因此，“食飯未”就變成“食飯命”
    叫—>el：叫你你又唔應—>el你又唔應
    咗—>hel：做咗功課未？做咗。—>做hel功課命？做hel。
    由於本人接觸面有限，僅能總結以上幾個，希望各位佛山嘅老鄉提供更多例子。

 

 

PS:現時佛山嘅人講咩話?

佛山市，不同区不同镇的方言都有不同，甚至有些是明显很大的差异；甚至有些地方，同一个镇都有好几种地方话。

 

一.禅城区

1.老城区:佛山话,广州话(老城区原住民较多,他们都是标准的佛山口音;而年轻原住民能讲标准的佛山话与广州话)

2.除老城区和石湾以外的地区:广州话(这些地方主要是人员构成主要是外来的,特别系年轻人,都可以讲标准广州话,有D年轻人仲偏向香港口音,但唔排除某些长者有佛山口音)

3.石湾:石湾话(石湾话根深蒂固,大部分年轻人也带石湾口音)

4.南庄:南海南庄话

 

二.南海区:

1.桂城:带不同口音的南海话,广州话(桂城为南海中心,人员构成复杂)

2.南海其他地方:西樵话、九江话、沙头话、丹灶话、大沥话、平洲话

 

三.顺得区:

顺德话， 但各镇又有不同的口音

 

四.三水区&高明区:

三水区和高明区则有当地口音的白话和地方话

 

 

 

最后順便貼下佛山既名人:

WONG FEI HONG黃飛鴻

BRUCE LEE李小龍

KANG YOU WEI康有為

ZHAN TIAN YOU詹天佑

 

 

 

SOURCES:

http://blog.c2000.cn/more.asp?name=terry2rrz&id=643

http://www.cantonese.org.cn/school/ShowArticle.asp?ArticleID=12

http://blog.xjtu.edu.cn/uploadfile/200542174431881.JPG

http://www.zjol.com.cn/pic/0/01/12/10/1121002_998213.jpg

http://www.moon-soft.com/program/doc/readelite1101638.htm